يا ويلي شو ضيّعت وقت وهدرت طاقة

يا ويلي شو ضيّعت وقت وهدرت طاقة وأنا عم فتّش عن حب هون وهونيك وعند هيدا وهيديك ونسيت إنو الكل وكل شي ناقصين وحدك الكامل المصدر والنبع

يا ويلي شو ضيّعت وقت وهدرت طاقة وأنا عم فتش عنّك ربّي بكتاب وبرأيي وبفكرة وتمتمات صلاة ونسيت إنّك جوّا مغلغل بقلب قلبي مش برّا فوق بشي مطرح بعيد

يا ويلي شو ضيّعت وقت وهدرت طاقة وأنا عم جرّب كون قديسة وقلّد الطوباوي فلان والقديس فلان ونسيت إنّي بدل ما فتّش كون قديس لازم حافظ ع قداستي مش فيي نفحة روحك

يا ويلي شو ضيّعت وقت وهدرت طاقة وأنا إشتغل وإنجز تإترك أثر حلو وبصمة مميّزة ونسيت إنو بصمتك فيي بيكفي أوعالا وعيشا  مش أنا مجبول بكمشة طين انطبعت فيا كل بصمات حبّك ونَفَس شغفك

يا ويلي شو ضيّعت وقت وهدرت طاقة وأنا عم فتّش ع حدا يحمل عنّي همّي أو يساعدني بحمل جزء من همّي ونسيت إنّك ع الصّليب مش بس حملت همّي وخطيتي، حملتني كلني ورفعتني وخلّصتني

يا ويلي شو ضيّعت وقت وهدرت طاقة وأنا عم فتش ع كتف إمسح في دموعي وكب علاي خوفي وقلقي وانسيت إنّك بكل يوم هون وهلأ عم تقلّي أنا هون حامل وجعك وحاملك كلك

يا ويلي شو ضيّعت وقت وهدرت طاقة وأنا عم فتّش ع حدا يقعد معي ويشاركني أفكاري وأحلامي ونسيت إنك بكل ذبيحة إلهيّة بتقلّي بحب ما إلو مثيل قولي، طلبي، دقّي نقّي وخدي كلي جسدي واشربي دمي خديني كلّي إلك اتغذي تقووي تشجعي وقومي “مش يا ويلك بل هنيئًا إلك”.